■■■■■■■■■■■■■■■■■■■■■■■
لكل مؤيدي الفريق أحمد شفيق
■■■■■■■■■■■■■■■■■■■■■■■
يا ريت كل أدمن صفحة أو عضو في أي صفحة من صفحات تأييد الفريق شفيق يساعدني في نشر الموضوع دة
بداية عايز أقول الطبيعي إن حيحصل هجوم علينا وإتهامات والكلام اللي إنتوا عارفينه دة .. يا ريت كل واحد فيكم يقدر يمتص الهجوم وغضب دة ويحولوا لحاجة إيجابية من غير عصبية أو الهجوم على اللي بيهاجموا
مجموعة من الأفكار والنصائح بتمنى إنها تكون مفيدة ليكم جميعا
-1-
ودي الأهم أنا شايف كل شوية يتعمل صفحة بنفس الإسم .. وبعد كدة الأدمن يكلم الناس يقولوا دي الصفحة الرسمية .. يا جماعة الخير مش لازم كل واحد يبقى عايز يكون هو الأدمن .. ممكن كل اللي ليه فكر ومستعد إنه يتعب في الموضوع دة يتجمعوا كلهم في صفحة واحدة .. وساعتها حتعمل فرق كبير إن شاء الله
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
-2-
يا ريت بلاش موضوع يتعمل صفحة جديدة وتجمعوا فيها أعضاء كل الصفحات القديمة .. بلاش تضييع وقت .. الوقت مش في صالحنا واللي بيخططوا لناس تانيين بقالهم سنين بيخططوا للي بيعملوه .. يعني مفيش وقت .. يبقى تختاروا أكتر صفحة فيها أعضاء دلوقتي وطبعا يبقى إسمها مناسب لترشيح الفريق شفيق للرئاسة .. وتبقى هي دي الصفحة الرسمية منعا لتضييع الوقت .. وأهم حاجة مش تختاروها بالعدد بس متنسوش موضوع الإسم لإنه مهم وطبعا مؤسس الصفحة يبقى محل ثقة ومجهوده كويس وإنسان فاهم هو بيعمل إيه
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
-3-
بطلب من أي أدمن في الصفحة اللي حتبقى الرسمية إن شاء الله يغيروا باسوورداتهم ويخلوها صعبة شوية .. عشان تحموا الصفحة جامد .. وبلاش تخلوا أي واحد أدمن بدل ما تلاقوا فجأة كل تعبكم راح في ثواني وكمان يا ريت تقروا الموضوع دة وبحاول كل شوية أزود المعلومات اللي فيه عشان الناس تعرف تحافظ على بروفايلتهم
والأفضل تبعدوا عن أي حاجة ممكن تشكوا فيها .. أما تبقى أدمن صفحة مهمة لازم تبقى شكوك شوية كدة .. وبلاش الثقة الزيادة عن اللزوم في كل الناس
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
-4-
يا ريت القائمين على الصفحة يبقوا على إتصال مباشر بالفريق أحمد شفيق ويبقى عندهم آخر الأخبار عشان الصفحة تبقى شغالة وفي نفس الوقت يبقى في فيديو بتصوير محترم بكواليتي كويس وصورة مش مهزوزة للفريق شفيق وهو بيقول إنه إن شاء الله حيرشح نفسه ويقول كلمة للمؤيدين عشان الموضوع يبقى رسمي لكل واحد يدخل الصفحة وكمان مواعيد الإجتماعات يتعملها event عشان تبقى واضحة للجميع
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
-5-
الفيديوهات اللي تتحط في الصفحة يا ريت يا إما تترفع على الصفحة عن طريق الأدمن والأعضاء .. ولو أي أدمن ناوي يحط لينك لفيديو فا يا ريت يبقى الفيديو مرفوع على الأكونت بتاعه في يوتيوب .. مش لينك من النت وخلاص عشان يبقى هو اللي متحكم في التعليقات اللي حتتكتب عليه وكمان الفيديو ميتمسحش فجأة
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
-6-
بتمنى إن أكتر حاجة تبقى ما بيننا روح التعاون والنظام .. عشان الباقي منظمين بطريقة لا يمكن أن تتخيلوها .. وإحنا مهمتنا صعبة شوية عشان هم سابقيننا بفترة من الوقت .. عشان كدة عايزين كل خطوة ناخدها نبقى بنتحدى نفسنا قبل ما نكون بنتحدى غيرنا
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
-7-
مطلوب من أي أدمن أما يلاقي حد داخل يشتم كل اللي يتعمل إن يتمسح التعليق حفاظا على شكل الصفحة من غير أي خناقات .. لسببين عدم التشتيت وتضييع الوقت وكمان عشان الإحترام هو اللي بيمشينا مش حاجة تانية
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
-8-
محدش يقولي إعمل صفحة عشان متنسوش اللي قلته في تاني حاجة .. ولو كنت عايز أعمل صفحة كان زماني عملتها من زمان ومكنتش حكتب الموضوع دة .. لازم نكسب وقت إن شاء الله
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
-9-
لنشر الصفحة اللي حتختاروها واللي فيها ناس كتير .. مع طبعا دعوة الناس عشان يدعوا كل الناس .. يبقى في كذا أدمن يستخدموا موضوع إستخدام بروفايلهم بإسم الصفحة .. بمعنى إنه أما يكتب تعليق في أي صفحة يبقى بإسم الصفحة مش بإسم الأدمن وبكدة الصفحة تنتشر أكتر وأكتر
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
-10-
عايزين حد كدة يتجدعن ويعمل موضوع عن تاريخ الفريق شفيق من قبل ما يكون وزير لوزارة الطيران المدني لغاية اللي عمله بعد ما مسك رئاسة الوزراء .. ويبقى موضوع مرتب كدة وشكله جميل ويفتح النفس على القراية .. وممكن أساعد اللي حيعملوا معنديش مشاكل .. بس يبقى يكلمني وميكسلش .. ويا ريت تجميع المعلومات تبقى من كذا واحد وواحدة .. عشان ننجز في الوقت
إن شاء الله كل شوية حبقى أجدد الموضوع دة أما أعرف مقترحاتكم ويبقى فهرس لكل المقترحات والأفكار عشان ننقلها للصفحة بعد كدة .. والموضوع دة ما هو إلا مساعدة مبدأية بسيطة مني في الموضوع دة .. وأي حاجة محتاجنها أنا تحت أمركم
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
أحمد شفيق أثناء مؤتمر صحفي في القاهرة. تصوير: عمرو عبد الله دلش - رويترز
وطلب بس صغير كدة .. كل شوية حد يكلمني عشان آجي إجتماع وبحاول أجمع كل الناس في وقت واحد أحسن .. فـلو مقدرتش آجي أي إجتماع منهم يا ريت تعذروني عشان فعلا مش حقدر أكون في كذا مكان في نفس الوقت .. ومقدر كل الناس اللي كلموني بجد وسعدت جدا بكلامهم .. ودي من الحاجات اللي شجعتني إني أكتب الموضوع دة
ربنا معانا وبالتوفيق إن شاء الله للجميع
وعلى خيرة الله نبدأ وإن شاء الله نهاية اللي بنعملوا يبقى بداية عصر رائع وجديد للبلد
تحياتي وتقديري
بقلم
مجموعة من شباب مصري يحاول فهم الحقيقة وتوصيلها لمن يريد خير لهذا البلد
0 comments:
إرسال تعليق
جميع الردود تعبّر عن رأي كاتبيها فقط. حريّة النقد والرد متاحة لجميع الزوار بشرط أن لا يكون الرد خارج نطاق الموضوع وأن يكون خال من الكلمات البذيئة. تذكّر قول الله عز وجل (مَا يَلْفِظُ مِن قَوْلٍ إِلاَّ لَدَيْهِ رَقِيبٌ عَتِيد).